لطفابراي ديدن تصاوير به ادامه مطلب مراجعه شود 

کوسموشم داغیندان - باغیندان سنین

سندن اوز چووروب گئدیرم وطن

منی قوجاغیندا یاشادمادین شاد

هممشه کونلومه پای وئریرسن چن

*

من سنه بیر بالا سن منیم آنام

نئیه قوجاغیندا لای -لای دئمیرسن؟!

منیم چون گئجه لر اولدوزون یوخدی

گوندوزلر گونشه حسرتلی یه م من

*

بلکه ده اوگئی ام اوشاغلیقیمدان

اوزگه لیقدن گلیب توش اولدوم سنه

یازیغلیغین گلدی منی ساخلادین

اما گوسترمه دین محبت منه

*

اگر دوغما بالان اولسایدیم سنین

قیمازدین گوز یاشیم آشیب داشلانا

گوزون قاباغیندا یتیم یاشایب  

حایاتیمدا یئنی غصه باشلانا

*

عزیز توپراغینا سیغینمیشام من

عمروم گول عمرودی کئچیندیر منی

کدرلی "صونانی "آغلاتماگینان

آرزیلار یوردومون گوزل مدفنی

ائویمین دیوارلاری یوخ!!

شهـــــــریمده

جوشغون بولاغیمیزی

لیل له دن واردی!

داها سوزلرینده دورولوق یوخ!

سئودامیز ندنسه مزه سیز اولوب؟!

آغی دادی وئریر باخیشلاریمیز

گوروشله ریمیز سویوق

اللریمیز اوزگه

حایاتیمیز دَیرسیز

کووشماق بهانه سی گورونمور داها

سون قوی بو یالان سئودامیزا

سون قوی

** 

اللرینده کی

کوزه رن سیگارینا

جیجیک له نیره م

نئیه کی

خالق ایچینده

ایضطرابسیز سئویرسن اونو

دیکسینیر اوره گیم هیجران ادیندان

الینی -الیمده برک ساخلامیشام

 ایلدیریم -ایلدیرم زوغ آتیر قورخو

گؤزومو برک یوموب درد یوخلامیشام

* 

اگر گؤز آچسامدا سنسیز دونیایا

 منی باخیش -باخیش درد آپاراجاق

 اومیدله قووردوغوم خیال ائویمدن

 منی کرپیج -کرپیج غم قوپاراجاق 

* 

ظلمت دی اؤلورم  ایشیق یولی یوخ

داها آرزیلاریم کفن سیز قالیر

کیملر قویلایاجاق بو جنازه می ؟

غریب ایستکلریم وطن سیز قالیر

* 

نئدیر !؟بو کونلومو اؤیور اؤلن وقت ؟

نئدیر کوهول -کوهول یول آچیر هارا؟؟؟

بو کیمدی قالخیزیر آیاغا منی ؟؟

نه اولور فیکریمدن سیلینیر قارا؟؟

* 

قورخودا یاشاسام یاشام دَیرسیز

کونلومده  اومودا  -آرخ آشمالیام

سئؤیرم دوم -دورو لام آخسین حایات

منده یاشیلیقلا یاناشمالیام !!

* 

الیمی بوراخما آماندی گولوم

بوراخسان حایاتیم اولار قازامات

سئوینج بیتگیلرین بیتیر کونلومده

بلکه مــنه معـــنا تاپا کائــنات

* 

سن غزل عاشیقی من گؤل عاشیقی

شعرینده گؤلومــی یاشادمــالیسان

مورگولو  - مورگولو  ایســتکلریمی

"صــونا"لی گــؤللرده اویاد مالیسان

آخدیرما اوزونه گؤز یاشلارینی        سنی گؤز یاشینا باغیشلامارام

آنمیشام اورگین داشداندی سنین      آند اولا داشینا باغیشلامارام

دونن کوچه میزده سؤز سندن ایدی

قونـــشوزون قیزیلا قاچیبــسان گمان

اوزگــه شــهــرلـردن گلــیر سراغـــیـن

وطنـــی یــادینا سالمیــرسان بیر آن

یادیــندا بیرینه وعـــده وئــــرمیشدین ؟؟

او قیز وعده سینده هــله ده  قـالیر

هر یئتن سؤز آچیر ائولنـمه گینـدن

 او قــیزین کــونلونــو طاقتــدن سالیر

اؤزگـــه شـــهـــرلرده گزیرسن هله

بیر گون وطن عشقی دوشر باشینا

قـــایــدیــب گــلرسـن وعــده یئرینه

اوندا بــاشـین دَیــر حـــسرت داشــینا

کاش عشقین حرمتین ساخلایا هامی

قـــورولان وعـــده لــر یئــرینـــه یــئتــه

حــایــاتــا بــیر آنــلیــق قــوناغ گلمیشیک

کــاش کـــی شیرینــلیقــله عمروموز اوته

چوخ حایف  عشقی تام  یاشادان یوخدی

قــالارقی بیر عشقه حســرتدی "صـــونا "

عــشــقــدن دم ووران عــاشیق یاشایان

کـــاش عـــشقین معناسین بیـــر ذره قانا

اوشـــویور اورگیــم – دونــور اللــریــم

سویوق دی بو غربت –قوجاغین هانی؟

واریــمدی هـــر لــحظه سنه احـتیــاج

کـوُزلی- محبــتلی اوجاغــین هــانــی؟

گل سویوق جسمیمی آل قوجاغینا

ایسینیم - کورپه تک یاتیم قــوینوندا

آغلار اورگیمی باس باغریــنا سن

دونــیانــین غملرین آتیم قــــوینوندا

ماوي گؤزلرينده  اوزمک ایسترم

فرصت وئر کونلونده یاشاییم هله 

پاییــز نفــسیندن سـن منی قــوُرو

کدر .گوُیرتیمی وئرمه سیــن یئله

نه گوُلوم –دنیزیم – نه بولاغیم وار

آدیمی هر یئتن سسله ییر "صـونا"

دوشـورسـن یادیــما آرخـالانــیرام

سـن مــنه بـو آدی قـویـوبسـان آنا

اليـمي الينـه آلمیاجاییدین

ازل گون ايستكلي سؤيله دين سالام

سنلي گونـلريمي وئريرم سـنه

آخير محبتين گـل گوستر منـه

گئديرسن ياديندا ساخلا بوسؤزو

وفاسیزین گولمیه جک بیل اوزو

گئديشـينله سَپدين يارامـا دؤزو

دئه مني اوزونه اويرتدين نئدن؟؟

کیمسه سئوگیمیزین سرّین بیلمه دی

يئنه ده كونلومده اؤيالانيرسان

سنلي گونلريمي خاطيرلاياندا

كاشكي وعده گوني اؤلئيديم گولوم

كدرلي اورگيم ساغالمير بير آن

آي ظاليم كونلومه بتر توخوندون

چاليشديم كي سني حالال ائیله يم

كونلومون بو سؤزي ديليم باغلادي

دومان چن چكيلمير كونلومدن منيم

ياغاندا ،غم ياغير، سولور گوللريم 

ندنسه طالعيم بئله يازيليب ؟؟

ندنسه بوش قالیب منیم اللریم

ياي يازيم كدردن پاييز گورونور

گوز ياشيم بير عومور ياغير اوزومده

يغيليب بير ماحال سوز اورگيمده

چكيللر ديليمي دارا اوزومده

قورخورام ديل آچيب غميمدن دئيه م

 قورخورام ياد ائلده گوله لر منه

گوزله ريم ديليمه ماجال وئرمه يير

بوحسرت باخيشيم بورونموش چنه

 آ،! گوللر! " صونا"سیز سالامات قالین

سيزدن اؤز چئويريب كوچوب  گئديرم

 بیر کیمسه یاشاما  ده یر وئرمه ييب !

كوچوب بو گؤللري غمسيز ائديرم

نه يولدان هاراي وار نه گؤزله مكدن

خيالين بورونوب چنه كونلومده

گونله ريم اوتدوكجه سنسيز دولورلار

غصه بيتگي له ري دنه كونلومده

اؤ سوزگون باخيشين چيخمير ياديمدان

بير آنليق بوراخمير خيالين مني

اللرين هله ده اللريمده دي

گؤرورسن؟؟...اليم ده اونوتمور سني !

قيسمتيم بئليميش گره ك گئديدين

گره ك آغلاييدي منيم گؤزله ريم

باخيشيم يوللاردا نغمه قوشيدي

نظمه چكيليدي غملي سؤزله ريم

بيلميرم هالاردا گزيرسن گولوم ؟

هانسي باخيشلارا ياتاغدي گؤزون ؟

اللرين كيمله رين اللرين توتوب؟

بسله يير عشقيله كيمله ري سؤزون ؟

سن گئدين غربته من وطن ده يه م

من آغلار قالسامدا سن گولر ياشا!

عمرومون گؤنله ري چنلي بورانلي

سنين حسرتينده چيخاجاق باشا

اودلو باخيشلارين

بوز دويغولاريمي

اودا چكيرلر

گؤزله ريندن ايراق

اريیب-اريیب سويا گئديرم

+++++++++++++++++++++++

سئوگيه بويانميش سؤزون

ندنسه بيلميرم

مني كوسدورور؟

يا سنين ديلينده

سؤزونده گوناه !

يا منيم اورگيم

ديمه دوشردي !!

.

حزین بیر سیزیلتی اوجالیب عرشه

دالغا دالغا درددی کونلوم دنیزی

سیزلاییر گوینه ییر حسرت یاراسی

ائله بیل بورویوب اولؤم دنیزی

*

گوزله ریمده گونش دوغولمور داها

 غم غصه سئل کیمی آخیر گوزومدن

سوسموشام کدردن لال اولوب دیلیم

آلینمیر دای یاشام سس سیز سوزومدن

*

حایاتیم قارایا بوروندو نئدن؟؟

یام یاشیل باهارا حسرت یاشادیم

فصیللر عومرومده یا قیش یا پاییز

چیچکلی بوستاندا تانیلمیر آدیم

*

کدردن یازدیقجا گؤللر قورویور

یاشیل باش "صونا"لار کوچور غربته

دیلک چیچکله ری خزل له شیر لر

نیسگیللی اورگیم دولور حسرته

چيلغين اللريمه حنا ياخديلار

دئديلرگلين ليك حناسيدي بو

بير اوتاق قوردولار گولدن چيچك دن

داها بوندان بئله ياشامين بودو

*

آغلاديم دئديلر حايات ياني بو!

ايسته مز ائليمدن آيريلدي اليم

هئچ اورك كونلومله اويغون اولمادي

دوشدوم غربت ائله بوكولدي بئليم

*

آي آنا يوردومون ايستي نفسي

سويوق توپراغينا آجيخميشام من

نه قدر اوزگه لر گولسه اوزومه

بورويور كونلومي چيسگين دومان چن

*

غربتين ايستي سين خوش سانانميرام

وطنين كوله گين قارين سئويرم

نه قدر اوزومه گولسه ده غربت

وطنين آغيسين خارين سئويرم

*

اليمي يوورام  غربت سويوندا

حنانين رنگ له ري سولور اليمده

قايديب گئديرم وطنه ساري

بير شله درد گئدير ايري بئليمده

*

وطنين حناسين ياخيم باشيما

غربت اوجاسيندان وطنه انيم

آل الوان رنگيله بويانسين ساچيم

"صونا"يام بو گؤلدي منيم مسكنيم

داغلاردا سسيمه سس وئرمير داها

سن كيمي داغلاردا ياد اولوب منه

آغلار باخيشيمي يوللار يوروبدو

يوللاردا غميمدن بورونوب چنه

*

ال اوزمور اورگيم شن خياليندان

شيرين سئوداميدين زهر دونيادا

حئیران باخیشلاریم  چاتمادي سنه

سنسيز قيسمتيمدي –قهر-دونيادا

*

سئوگي ديوانيني بوكوبدو كونلوم

سوسموشام هاراييم دونوب قهره

شنليك هئيكليمده ديزه چوکوبدو

آرزيمدي ظولمتيم يئته سحره

*

گره ك گلمه ييديم قوجا دونيايا

دونيانين غمله ري سارسيديب مني

پاييزلي حاياتدا وطن حسرتي

وورغون ايله ييب دي آي "صونا"سني

گئدیرسن یاواش گئت!

یاواش گئت گولوم !!!

آردینجا سورونور منیم اورگیم

گئدرگیم آستا گئت  یول چینقیل داشدی

بیر آن باخیشینی دوندر دالی باخ؟؟

آلقان آرزیلاریم ایز سالیب یولا

نیسگیله بورونموش اورگیم  منیم

آردینجا یوللاردا تیلیت قان اولوب

گئدیرسن آستا گئت! آستا گئت باری!!!

گوزومون ياشينا سيغما سن گولوم !

کئچن ایل

بیر قاریج توپراق

۷۰ایل شاختا چکمیش اللرینی

سویوق باغرینا چکدی

او گوندن بری

سنسیز!!

عزایه دولور دویغولاریم

نیسگیله بویانیر خیالیم!

بیر قاریج فاصله یینن

سنه چاتا بیلمیرم!!

آی "صونا"لی گؤلدی کؤچه ن قوجا قارتالیم

.

شیرین گیلئیلی

بیر اوووج توپراغا گوز یاشی قاتیب

سینه مده چیرپینان قلبی یاراتدین

ازلدن گؤزومه کــــدر سورمه سین

چکیب غم الینـــــن گونوم قاراتدین

*

ایسته دین آنلاریم آغلار سووشسون

آی تانری ازلدن نه ایدی گوناهـــیم؟؟

اشیگیم دویره مــــی کــدره ســالیر!

ایچـــیمی یانــــدیریرحسرتلی آهـــیم

*

حاياتيم ازلدن غمـــــــــله توره نيب

بوياق گوتورمه ييب ذيل قارا ظولمت

ندنسه من اوچون كدر وئريب سن؟؟

سحر لذتينه قالميشام حســـــــرت!

*

سئويب ظولمت لرده مني ياراتدين

آی آلاه هاراییم  خوش گلير سنه؟؟

"صونا"يام آغلارام ظولمت ايچينده

ياديــنلا بورونور غمـــيم كـــــفنه!

فانيس

گوزله رين فانيسدي كور باخيشيما

قارانليق آنلاردا بوراخما مني

قورخولو ظلمت ده قيچيم تيتره يير

سانيرام ده يرلي بير داياغ سني

*

يورغون اللريمي توت اللرينله

سويكه نيم هئيبتلي داغ ويقارينا

پولاد بير دوستاقدا بوغولوب حيسسيم

چیرپینیر دویغولار داش دووارینا

*

گوزله ريندن ايراق -منی- ماراليم!!

حصارا ساليبلار چاققاللار ئینه

قورخونج باخیشلاریم،یورغون گوزله ریم

"صونا"لی گوللره حسرت دی هله/

بیر داملا حسرت

کی هر قارانلیق گئجه ده

یالقیز گوزله ریمدن

دامیر ظولمته.

من سنه

یاددان چیخان بیر آرزییام

ایتمیشم کونلونون شن بوجاغیندا. 

حئیف گوزله ریمدن توکولن یاشا

دن دوشن ساچلارا بلالی باشا

ظولموندن دونئیدی اورگیم داشا

غمیندن دئینده آغلاماییدیم

*

هئچ یئره آغلاتدین گولدوردون منی

یاشاتدین -یاشاتدین اؤلدوردون منی

غمیندن سویله ییب سولدوردون منی

ازلدن بئل سنه باغلاماییدیم

*

قیسمتیم غم اولدی سنی گؤرندن

گوزونده یالانچی نمی گؤرندن

یالانلار سویله دین منی گؤرندن

کونلومی غمینله داغلاماییدیم

*

"صونا"نین عومرونی ایله دین هدر

کونلونه قالادین ،غصه ،غم، کدر 

گوزله ریم هیجریندن گزیر در به در

کاشکی سنله پئیمان باغلاماییدیم

اوُلونچه سن دندی سن دندی

 سُوزوم

سن اوچون شعر غزل یازارام اوُزوم

کونلومون خلعتین بیچه رم سنسیز

آجی آنلاریمین عمری اوزانیب

وارلیغیم کدرین اودوندا یانیب

اورگیم قیسمتین ائله بیل قانیب

آیریلیق زهه رین ایچه رم سنسیز

گلیبدیر هیجریندن نه لر باشیما

آغ ساچلار یاراشمیر بو آز یاشیما

آیریلیق قان قاتیر دای گوُز یاشیما

کوسوب بوگوُللردن کؤچه رم سنسیز

سن سسیز بیر ظلمت سن!

داریسقال بیر دوستاق!

سنین آنلاریندا

قورخولو یاشاییرام!

آددیم لاریمی قؤروموشام !

دویغو گؤزله ریمی باغلامیشام !!

کی سنده گزمه سینلر!

سنین !!!

عدالت سیز پای بولوشون

کونلومون کورپه سین جانا گئتیریب!!(دونيا)

آردینجا گلمه لیم

گئدگینن آردینجا گلمه لیم من

حسرتیم گوزونون ایزینده قالیب

بو غریب توپراقدا خزانلی کونلوم

یاشیل باخیشیندان بارلی باغ سالیب

*

سن منه دایاغسان غریب اولکه ده

جانیمدان ایرلی ایسته رم سنی

او ایستی الیندن کویرک کونلوندن

سن بیل بویوک تانری آیرما منی

*

بیلیرسن حایاتیم باغلیدی سنه

"صونا"لی گؤللری بوراخما باری

آخشاملار گونشین سون نفسینده

آغلایار گوزله ریم ایزینه ساری